किराणा, औषध विक्रीची दुकाने सकाळी 9 ते रात्री 9 पर्यंत सुरु ठेवा – सहाय्यक आयुक्त (औषधे) मा. ज. निमसे

नांदेड नांदेड जिल्हा

नांदेड  : वैजनाथ  स्वामी

अन्न, नागरी पुरवठा व ग्राहक संरक्षण विभागांनी गुरुवार 2 एप्रिल 2020 रोजी प्रसिध्द केलेल्या अधिसुचनेनुसार किराणा दुकाने व औषधी दुकाने सकाळी 9 ते रात्री 9 या कालावधीत चालु ठेवण्याच्या सुचना देण्यात आलेल्या आहेत. तसेच आवश्यकतेनुसार सदर दुकाने 24 तास सुरु ठेवावीत, असे आवाहन नांदेड अन्न व औषध प्रशासनचे सहायक आयुक्त (औषधे) मा. ज. निमसे यांनी केले आहे.

कोरोना विषाणुचा प्रादुर्भाव रोखण्यासाठी शासन स्तरावर विविध उपाय योजना राबविल्या जात आहेत. अन्न व औषध प्रशासन नांदेड या विभागाच्यावतीने सुध्दा विविध उपाय योजना राबविल्या जात असून त्याचाच भाग म्हणुन अन्न आस्थापना व औषध विक्री दुकाने यांच्या तपासण्या करण्यात येत आहेत.

तपासणीत औषधीसाठा, मास्क व सॅनिटायझर्स याबाबत पडताळणी करण्यात येत आहे. तसेच किराणा दुकानातून जीवनावश्यक वस्तुंचा मुबलक पुरवठा ग्राहकांना व्हावा याबाबत प्रशासनाकडून तपासण्या करण्यात येत आहेत. आजपर्यंत प्रशासनाने औषध विक्री दुकाने व अन्न आस्थापना यांच्या एकुण 339 तपासण्या केल्या आहेत.

तसेच विविध ठिकाणी अन्न आस्थापना व औषध विक्रेते यांच्या बैठका घेऊन जीवनावश्यक वस्तुंचा व औषधे, मास्क, सॅनिटायझर्स यांचा काळा बाजार करु नये व शासनाने निधारीत केलेल्या किंमतीत वस्तूंची विक्री करावी याबाबत सुचना देण्यात आल्या आहेत, अशीही माहिती नांदेड अन्न व औषध प्रशासनचे सहायक आयुक्त यांनी दिली आहे.